Kaj ne eblas ne rimarki jenon, ke post artikolo, en kiu plurfoje menciiĝas la koramiko de la verkinto, krome kelkaj karakterizaĵoj de JEBanoj, kaj enestas ankaŭ mencio pri “emociaj diskutoj kaj interrompoj” en la jarkunveno de EAB, tuj sekvis tute alitema artikolo kun titolo La junulo, kiu timis fantomojn. Bela koincido!

En tiu tempo multaj personoj opiniis, tute naive, ke Ivo Lapenna, veninte al Britujo el orienta Eŭropo (tiama Jugoslavio) estas iel danĝera homo. Oni eĉ deklaris lin “spiono de Tito”. Tio estis, el pluraj vidpunktoj, aserto politike analfabeta. Kelkaj pli kleraj personoj diris, defende al Lapenna, ke li estas nenia amiko de Tito (kaj por kio Jugoslavio spionus en Britujo?). Tion agnoskis Gething, kiu laŭ la mezuroj de tiu tempo estis homo politike modera, en sia letero.

Tiom pri la fono. La parto, kiu havas daŭran intereson, estas liaj komentoj pri timoj pri politika infiltrado en UEA kaj/aŭ BEA. Li diris jene (mia traduko):

“Mi ĉiam atentas tion, ke, kiaj ajn estas la politikaj opinioj de Lapenna, li originas el lando en kiu de jaroj estas uzataj komunismaj metodoj. La konata komunisma infiltrometodo estas, kiel eble plej multe ĉikani la oficulojn, krei kiel eble plej multajn perturbojn, kaj, ĝenerale igi la vivon de la oficuloj tiel netolerebla, ke ili pro naŭzo eksiĝas. Kompreneble, tio estas aparte facila en asocio de volontuloj.”

Ni lasu flanke politikajn opiniojn de Ivo Lapenna, makartismon, kaj aliajn historiajn eventojn de antaŭ 50 jaroj. La metodiko de infiltrado kiun trafe priskribis Gething validas senkonsidere pri politika tendenco.  Tio, pri kio oni tiam akuzis la Ĝeneralan Sekretarion de UEA, estis poste uzata kontraŭ li en la jaroj ’70. Kaj, se oni volus hodiaŭ fuŝi iun Esperanto-asocion, verŝajne tiu metodo same bone funkcius; kvankam, sendube, la esperantistoj kapablas fuŝi ĉion ajn ankaŭ sen deekstera infiltrado!

Viaj komentoj estos bonvenaj

… precipe se vi jam vizitis la ĝisnunajn retpaĝojn ĉe www.biblbut.org. Tiuj paĝoj iom post iom transiras ĉi tien, kaj la antaŭa adreso jam ne funkcias. Do se vi jam konas nin, unue legu la ĉi-malsupran averton, kaj poste faru vian elekton inter la paĝoj ĉi-dekstre montrataj.

Sed se vi ne jam konas la Bibliotekon, leginte la Averton, vi trovos kelkajn vortojn klarigajn en la paĝo “Pri la Biblioteko“.

Nia katalogo estas en la retpaĝoj de Esperanto-Asocio de Britio. Por serĉi en ĝi klaku ĉi tie.

Averto: Por ke neniu miskomprenu pro la titolo de la paĝaro, mi klarigu, ke tiuj ĉi artikoloj kaj blogeroj ne estas oficiala paĝaro de EAB, nek de ĝia biblioteko. La antaŭan <www.biblbut.org> kaj la nunan <biblbut.wordpress.com> fondis, redaktas kaj posedas Geoffrey King. Do komentoj eventuale subjektivaj aperantaj ĉi tie estas verkitaj aŭ aprobitaj de la redaktanto kaj ne pretendas esti opinioj de EAB.