Barbara Mary Platt (n. Williams)

Neniam oni scias, al kiaj eventoturniĝoj onin portos scio de Esperanto. Barbara Williams naskiĝis en 1930 en la kimra vilaĝo Markham, apud Caerphilly. Pri ŝia junaĝo ni ne jam havas informon, sed ni trovas ŝin en aŭ antaŭ 1970 en la apudlondona urbo Watford, kaj tie jam esperantisto.
Kaj estante apudlondona esperantisto ŝi ne povis ne koni Bert Platt, kaj tiel bone konis lin, ke ili geedziĝis en 1970 en la Franca Protestanta Preĝejo, en la fama “duobla geedziĝo” pri kiu videblas bildo en la paĝo pri Bert Platt.
De tiam dum deko da jaroj ŝi estis la dua oficisto de Brita Esperanto-Asocio; sed ŝian laboron iom post iom malhelpis sanproblemoj. Delonge oni rimarkis balbutemon. Poste aperis problemoj ĉe la kruroj; dum la 65a Universala Kongreso (Stokholmo 1980) ŝi falis kaj rompis genuon. Fine oni diagnozis mamkanceron, kaj en la samjara septembro operaciis.
Kiam ŝi devis ekuzi radseĝon la malfacilo fariĝis pli severa, ĉar la gesekretaria apartamento situis du etaĝojn super la oficejo. Ekis longaj klopodoj por instaligi lifton. Oni serĉis, kaj fine ricevis, ĉe la municipo (Kensington) subvencion por tio, kun motivo, ke tio estas helpo al handikapulo. Letero de la hospitalo St. Stephen (Chelsea) je 1983.06.28 konfirmas tiun bezonon. Kelkaj voĉoj en BEA tamen kontraŭis instalon de la lifto pro la necesaj strukturaj laboroj. Bert Platt devis energie insisti por ke oni akceptu la planon.
Dum tiuj fuŝumadoj, ne la unua malglora momento en la labordunga historio de BEA,  la sano de Barbara Platt daŭre degeneris, kaj en iu punkto (ŝajne en 1983) Bert Platt diris – laŭ manskribita noto trovita en nia Arkivo – al volontula sekretario John Brownlee, ke ŝi kredeble ne revenos al la laboro.
Barbara Platt fine mortis 54-jara en londona hospitalo, la 13an de oktobro 1984.
La intertempe instalitan lifton oni uzetis dum iom da tempo; Bert Platt volonte iris supren-suben en ĝi, kaj oni foje uzis ĝin por suprenirigi pezaĵojn. Fine la asocio decidis ĉesi uzi ĝin, pro la kosto de ĝia prizorgo.
En la menciita Franca Protestanta Preĝejo, la 10an de februaro 1985, okazis memoriga diservo honore al Barbara Platt, dek kvin jarojn post la samloka geedziĝo.